شرَّبنـــي يا آبا
م الهوى
عطشان صبابا
جوايا يا آبا
..ألف قلــب
. عايز يحب
وعيوني يا آبا
عيون غلابة
مش لاقية حب
***
شربني يا آبا
ماتحكليش حواديت زمان
مات زمانكوا .. راح .. وهـان
زمانّــا يا آبا
أصله غابة
منزوع له قلب
***
وأنا تهت يا آبا
تهت واتلطمت يامــا
جوايا حب
كائن خرافي
ساكن بقلبى
عيوني وحدها شايفاه
وحدها عشقاه
بتدور تحب
***
جوايا قلــب
محتاج لقلب
محتاج له قلب
عايز يحــــب
يعزف ربابة
ويدور مسافر في الحياة
وحده كده
في الدنيا زي الطيف حزين
من غير أنيــن
زي السحـــابة
***
شربني يا آبا
م الهوى
م الدنيا
م الأحلام
وسيبني
طلّق كفوفي م القيود
من غير سدود
هــجري .. لوحدي
وارمح ، بعيــــــد
لكن لفين ؟
لحد ما الأحلام تاخدني
وتلف بيا
تتوهني
جايز ألاقي ف حضنها
حلــم الصبا
***
شربني يا آبا
م الهوى
عطشان صبابا
خد بإيدي ع الطريق
أوعاك تسبني - وحدي - غريق
دا أنا تهت يا آبا
تهت واتلطمت يا مـــا
من غير صديـق
من غير حبيب
******
فقط من أجلك ، لأنك صديقي ، ولأني أحبك ، تركتك تكتب هنا آخر كلماتك ، الكلمات التي أعرف أنك كتبتها بدموعك ، وسطرت مع أحرفها دمائك
هو بوستك الأخير ، لن أدعك تقتل نفسك ببطء ، وتموت بين ذراعيّ، لأرثيك في صمت .
تشبث بيدي
ودع لي القياد
وارحل معي لهناك ، دع لي عمرك ، ولن تندم
هلم
5 ::من شرفوني بالرد:
جميلة اوي يا مصطفى .. بس اللي ابوه عمره ما كان موجودله عشان يناجيه يعمل ايه ..
وجعتني يا مصطفى..
محمد
أنا آســـف بجد
مرار يا مصطفى.. القصيدة مليانة مرار و ألم.. أكتر من أى مرة قرأت لك فيها..
و العنوان
البوست الأخير
هو فى إيه ؟
إنت ماشى و لا إيه ؟
و هتسيب إسكندرية بجد زى ما سمعت ؟
يعنى إحنا هننقص ؟
هو عمرنا ما هنزيد أبدًا ؟
هو فى ايه !
مصطفى يحيى
مش عارفه اقولك ايه
بجد وجعتنى
غير انك بجد بتملك قلم جميل جدا جدا فوق الوصف
انا عمرى مقريت كلام بالعاميه بالحلاوة دى
والله مبجامل
لكن
بجد انت جميل اوى
..................
انا بجد بشكر الصدفه الى عرفتنى بمدونتك
والى شوفت لنكها فى منتدى دار ليلى للنشر
تحياتى لجمال كلماتك
إرسال تعليق